ИННОВАЦИЯ МЕН ӨНДІРІСТІ ТОҒЫСТЫРҒАН БІЛІМ ОРДАСЫ

АЛМАТЫ ТЕХНОЛОГИЯЛЫҚ УНИВЕРСИТЕТІ: ӘЛЕУМЕТТІК-ГУМАНИТАРЛЫҚ ДАЙЫНДЫҚ – КӘСІБИ МАМАНДЫҚТЫҢ НЕГІЗІ

Алматы технологиялық университеті (https://atu.edu.kz)  инженерлік-технологиялық бағыттағы мамандарды даярлаумен қатар, олардың әлеуметтік және гуманитарлық дүниетанымын қалыптастыруға ерекше мән беретін жоғары оқу орындарының бірі. Университет құрылымындағы әлеуметтік-гуманитарлық пәндер (ӘГП) кафедрасы осы міндетті жүзеге асыратын маңызды академиялық орталық ретінде қызмет етеді.

ӘГП кафедрасының басты мақсаты – студенттерге тек кәсіби білім беру ғана емес, сонымен бірге азаматтық жауапкершілігі жоғары, тарихи санасы қалыптасқан, құқықтық мәдениеті мен сыни ойлау қабілеті дамыған тұлға тәрбиелеу. Кафедрада Қазақстан тарихы, философия, құқық негіздері, саясаттану, мәдениеттану, әлеуметтану сияқты пәндер оқытылады. Бұл пәндер техникалық мамандықта білім алатын студенттердің кәсіби қызметін кең әлеуметтік контекстте түсінуіне мүмкіндік береді. Кафедра оқытушылары оқу үдерісінде заманауи білім беру әдістерін қолданады: интерактивті дәрістер, пікірталас сабақтары, кейс-талдау, жобалық жұмыс, академиялық жазылым элементтері. Студенттер ғылыми-зерттеу жұмыстарына тартылып, конференциялар мен дөңгелек үстелдерге қатысады. Бұл олардың талдау жасау, дәлелдеу және ғылыми пайымдау дағдыларын қалыптастырады.

ӘГП кафедрасының ғылыми қызметі де белсенді дамуда. Оқытушылар ұлттық тарих, құқықтық мәдениет, қоғамдық сананың трансформациясы, жастардың әлеуметтік бейімделуі, мемлекет және қоғам қатынастары сияқты өзекті бағыттарда зерттеулер жүргізеді. Ғылыми нәтижелер оқу процесіне енгізіліп, студенттердің зерттеушілік қызығушылығын арттыруға ықпал етеді.

Кафедраның тағы бір маңызды бағыты – тәрбие жұмысы. Университетте патриоттық кездесулер, ашық дәрістер, тарихи-танымдық іс-шаралар, пікірталас клубтары ұйымдастырылып, студенттердің белсенді азаматтық ұстанымы қалыптастырылады. Әсіресе шетелден келген студенттер мен қандастардың жаңа ортаға бейімделуіне, қазақ тілдік және мәдени кеңістігін игеруіне кафедра тарапынан әдістемелік және академиялық қолдау көрсетіледі.

Осылайша, Алматы технологиялық университетіндегі әлеуметтік-гуманитарлық пәндер кафедрасы техникалық білімді адамгершілік, құқықтық және тарихи құндылықтармен ұштастыратын маңызды буын болып табылады. Кафедра қызметі университеттің білім беру философиясын айқындап, болашақ мамандардың тек кәсіби тұрғыдан ғана емес, тұлғалық тұрғыдан да қалыптасуына негіз қалайды.

Әлеуметтік-гуманитарлық пәндер кафедрасының меңгерушісі, философия ғылымдарының кандидаты Рысбеков Қадыр Қойшыбекұлы,
Алматы технологиялық университеті ӘГП кафедрасының қауымдастырылған профессоры, тарих ғылымдарының кандидаты  Сагнайқызы Самал

АЛМАТЫ ТЕХНОЛОГИЯЛЫҚ УНИВЕРСИТЕТІ: ИННОВАЦИЯ МЕН ӨНДІРІСТІ ТОҒЫСТЫРҒАН БІЛІМ ОРДАСЫ

Қазақстандағы инженерлік-технологиялық білім беру жүйесінде өзіндік орны бар жоғары оқу орындарының бірі – Алматы технологиялық университеті (https://atu.edu.kz). Университет көп жылдық тәжірибесі мен заманауи білім беру тәсілдерін үйлестіре отырып, тағам, жеңіл өнеркәсіп, сервис, цифрлық технология және бизнес салалары үшін жоғары білікті мамандар даярлауды мақсат етеді. АТУ-дың негізгі ерекшелігі – білім беру үдерісінің өндіріс талаптарымен тікелей байланыстырылуы. Оқу бағдарламалары еңбек нарығының нақты сұраныстарына сәйкес жаңартылып, студенттер теориялық біліммен қатар өндірістік тәжірибеден өтеді. Университет зертханалары мен оқу-өндірістік орталықтары тағам технологиясы, биотехнология, стандарттау және сертификаттау, логистика, ақпараттық жүйелер сияқты бағыттар бойынша практикалық дағдыларды қалыптастыруға бағытталған.

Университеттің ғылыми әлеуеті де айрықша. Ғалымдар тамақ өнімдерінің қауіпсіздігі, ресурс үнемдеу технологиялары, экологиялық таза шикізатты өңдеу, функционалды тағам өнімдерін әзірлеу, цифрлық өндіріс модельдері сияқты өзекті бағыттарда зерттеулер жүргізеді. Бұл жұмыстар тек теориялық сипатта қалып қоймай, өндірістік кәсіпорындармен бірлескен жобалар арқылы нақты нәтижелерге айналып келеді. АТУ халықаралық білім беру кеңістігіне де белсенді кіріктірілген. Университет шетелдік жоғары оқу орындарымен академиялық ұтқырлық бағдарламаларын жүзеге асырып, студенттер мен оқытушылардың тәжірибе алмасуына мүмкіндік береді. Бірқатар білім беру бағдарламалары қос диплом элементтерімен жүзеге асырылып, түлектердің жаһандық еңбек нарығындағы бәсекеге қабілеттілігін арттырады. Осыған байланысты университетті Түркіменстаннан келген студенттер мен тарихи Отанына оралған қандастар жиі таңдайды: тілдік ортаға бейімделу мүмкіндігі, практикалық бағыттағы мамандықтар және қолайлы академиялық қолдау жүйесі олардың білім алуына тиімді жағдай жасайды.

Студенттік өмір де университет имиджінің маңызды бөлігі. АТУ-да ғылыми үйірмелер, стартап жобалар, еріктілер қозғалысы, шығармашылық және спорттық клубтар белсенді жұмыс істейді. Бұл жастардың тек кәсіби ғана емес, әлеуметтік және көшбасшылық дағдыларын дамытуға ықпал етеді.

Бүгінде Алматы технологиялық университеті – өндіріс пен ғылымды, білім мен инновацияны тоғыстырған заманауи университет. Оның басты құндылығы – бәсекеге қабілетті маман ғана емес, қоғамға пайдалы, жауапкершілігі жоғары, жаңа технологияларды меңгерген жас буынды қалыптастыру.

АТУ ӘГП кафедрасының қауымдастырылған профессоры, тарих ғылымдарының кандидаты Самал Сагнайқызы
АТУ ӘГП кафедрасының ассистент-профессоры, заң ғылымдарының кандидаты Құралай Жұмабаева