АКАДЕМИЯЛЫҚ ҮДЕРІСТЕРДІ ЦИФРЛАНДЫРУ

2026 жылғы 24 қыркүйекте ҚазҰУ-дың https://farabi.university   Филология факультетінде тест тапсырмаларын әзірлеу, рәсімдеу және цифрлық білім беру жүйелеріне енгізудің жаңартылған тәртібіне арналған арнайы іс-шара ұйымдастырылды. Тренинг барысында тест тапсырмаларын әзірлеу және оларды Univer ақпараттық жүйесі мен Moodle қашықтан оқыту жүйесіне орналастыру тәртібі түсіндірілді. Іс-шараны Академиялық және тәрбие жұмысы сүйемелдеу департаменті Ақпараттық технологиялар департаментімен бірлесіп өткізді. Тренинг барысында қатысушыларға жаңартылған ішкі нормативтік құжаттар таныстырылып, тест тапсырмаларын әзірлеу мен пайдаланудың жолдары қарастырылды. Ішкі нормативтік құжаттарға енгізілген өзгерістер жөнінде Білім беру үдерісінің сапасын қамтамасыз ету басқармасы басшысы А.А. Мусинова ақпарат берді. Оқыту семинарының негізгі мақсаттары мен міндеттерін Академиялық талдау және білім сапасын бақылау офисі басшысы А.Т. Ботаева таныстырды. Цифрлық офицер К.О. Кохан цифрлық құралдарды пайдалану және ақпараттық жүйелердегі жұмысты ұйымдастыру мәселелеріне тоқталды. Академиялық және цифрлық инновациялар офисінің өкілі И.И. Круговых цифрлық құралдарды қолдану ерекшеліктері мен ақпараттық жүйелердегі жұмыс тәртібін түсіндірді. Сондай-ақ факультеттердің оқыту кестесін толтыруының дұрыстығын тексеру мәселесіне арнайы көңіл бөлінді. Семинардың практикалық бөлімінде белгіленген әдістемелік талаптарға сәйкес тест тапсырмаларын әзірлеу, рәсімдеу және Univer мен Moodle жүйелеріне жүктеу тәртібі көрсетілді.

Цифрлық құралдар – білім сапасын арттырудың маңызды тетігі. Тестілеу үдерісін ұйымдастыру тәсілдерін жаңарту бағалау материалдарын әзірлеу мен қолданудың бірыңғай қағидаттарын қалыптастыруға бағытталған. Оқытушылар, кафедралар, факультеттер мен тиісті құрылымдық бөлімшелердің өзара үйлесімді жұмысы академиялық рәсімдердің ашықтығын қамтамасыз етіп, белгіленген талаптардың бірізді орындалуына мүмкіндік береді. Іс-шараға оқу-әдістемелік жұмыс жөніндегі декан орынбасарлары, кафедра меңгерушілері, Оқыту мен білім беру сапасы жөніндегі академиялық комитеттердің төрағалары мен мүшелері қатысты. Қатысушылар құрамының ауқымды болуы жүргізіліп отырған жұмыстың жүйелі сипатын көрсетеді. Бұл өз кезегінде университеттің әртүрлі деңгейлерінде жаңартылған талаптарды іске асырудың мақсаттары мен тетіктерін біркелкі түсінуге мүмкіндік береді.

Univer және Moodle жүйелерінде тест тапсырмаларымен жұмыс істеу – ҚазҰУ-дағы білім беру үдерістерін цифрландыру және академиялық басқару жүйесін жетілдіру бағытындағы жұмыстардың маңызды бөлігі. Әдістемелік талаптарды цифрлық технологиялармен ұштастыру бағалау рәсімдерін біріздендіруге, тест тапсырмаларының сапасын арттыруға және білім алушылардың оқу нәтижелерін бағалауды тиімді ұйымдастыруға мүмкіндік береді. Бұл жұмыс университетте бірыңғай академиялық стандарттарға, заманауи цифрлық технологияларға және сапаны қамтамасыз ету мәдениетіне негізделген білім беру ортасын қалыптастыруға бағытталған. Факультеттермен жаңартылған талаптарды енгізу бойынша жұмыс бекітілген кестеге сәйкес жалғасын табады.

Саткенова Жайна Бағашарқызы –

филология ғылымдарының кандидаты, қауымдастырылған профессор,

әл-Фараби атындағы ҚазҰУ Филология факультеті деканының оқу жұмысы жөніндегі орынбасары.

Аккузова Айнур Абдыжалиловна – PhD, доцент м.а.,

әл-Фараби атындағы ҚазҰУ Филология факультетінің

Оқыту мен білім беру сапасы жөніндегі академиялық комитетінің төрағасы.