Республика күні – елдіктің бастауы, тәуелсіздіктің тұғыры

Республика күні – Қазақстанның мемлекеттілік тарихындағы маңызды белесті айқындайтын, ұлттық рухымызды асқақтатып, елдігіміз бен егемендігімізді дәріптейтін ерекше мереке. Бұл күн халқымыздың тарихи жадын жаңғыртып, тәуелсіздіктің қадірін терең түсінуге, ұлттық құндылықтарды құрметтеуге және ортақ болашаққа деген сенімді нығайтуға үндейді. 1990 жылғы 25 қазанда Қазақ КСР-інің мемлекеттік егемендігі туралы Декларация қабылданды. Бұл тарихи құжат Қазақстанның дербес мемлекет ретінде қалыптасуына негіз болған маңызды саяси-құқықтық қадам еді. Декларацияда республиканың аумақтық тұтастығы, мемлекеттік биліктің дербестігі және ұлттық мүдделердің басымдығы сияқты маңызды қағидаттар көрініс тапты. Осы тарихи оқиға еліміздің тәуелсіздікке бастар жолындағы шешуші белестердің бірі ретінде ұлттық тарихымыздан ерекше орын алады.

Осы маңызды мерекеге орай әл-Фараби атындағы Қазақ ұлттық университетінде (https://hh.farabi.university) мерекелік іс-шаралар ұйымдастырылып, Республика күнінің тарихи маңызын кеңінен насихаттауға, ұлттық құндылықтарды дәріптеуге және білім алушылардың бойында отаншылдық сезімін қалыптастыруға бағытталған жұмыстар жүргізілді. Университет қабырғасында аталып өтетін мемлекеттік мерекелер білім алушылардың ел тарихына деген қызығушылығын арттырып қана қоймай, олардың азаматтық ұстанымын қалыптастыруға, тарихи оқиғалардың мәнін түсінуіне және Қазақстанның бүгінгі жетістіктерін бағалауына мүмкіндік береді. Мұндай іс-шаралар білім мен тәрбиені ұштастырып, университет қауымын ортақ құндылықтар төңірегінде біріктіреді.

Әл-Фараби атындағы ҚазҰУ-дың жоғары оқу орнына дейінгі білім беру кафедрасында да білім алушылардың тарихи танымын кеңейтуге, ұлттық мәдениет пен рухани мұраны танытуға, Қазақстанның қоғамдық және мәдени өміріне бейімделуіне ерекше мән беріледі. Жоғары оқу орнына дейінгі білім беру кафедрасының қызметінде Қазақстан тарихын оқытудың орны ерекше. Себебі кафедрада тарихи Отанымен байланысын тереңдетуге ұмтылған қандастармен қатар, Қазақстанға білім алу мақсатында келген шетел азаматтары да білім алады. Бұл – Қазақстанның тарихын, мәдениетін, салт-дәстүрін және қазіргі даму жолын таныстыруға мүмкіндік беретін маңызды білім беру ортасы. Қандастар үшін Қазақстан тарихын меңгеру – ата-бабалар мекенінің өткенін тереңірек танып, тарихи тамырын сезінудің, ұлттық бірегейлігін нығайтудың және тарихи отанымен рухани байланысын бекітудің маңызды жолы. Әлемнің әртүрлі елдерінен келген қазақ жастары үшін туған елінің мемлекеттілік тарихын, ұлттың қалыптасу жолын, тарихи тұлғалардың қызметін және тәуелсіздікке жету кезеңдерін білу айрықша мәнге ие. Ал шетел азаматтары үшін Қазақстан тарихы пәні еліміздің өркениеттік дамуын, Ұлы дала тарихын, көшпелі мәдениеттің ерекшеліктерін, қазақ халқының рухани мұрасын және қазіргі Қазақстанның қалыптасу жолын түсінуге мүмкіндік береді. Тарихи білім шетелдік білім алушылардың Қазақстан қоғамына бейімделуіне, мәдениетаралық түсіністіктің қалыптасуына және елге деген құрметінің артуына ықпал етеді.

Қазақстан тарихын оқыту тек тарихи даталар мен оқиғаларды меңгертумен шектелмейді. Ол – ұлттық мемлекеттіліктің қалыптасу кезеңдерін түсіндіру, тарихи сабақтастықты көрсету, мәдени мұраның маңызын ашу және жас ұрпақтың бойында ел тарихына деген құрметті қалыптастыру үдерісі. Осы тұрғыдан алғанда, жоғары оқу орнына дейінгі білім беру кафедрасындағы Қазақстан тарихы пәнінің тәрбиелік және танымдық әлеуеті зор. Сабақ барысында білім алушылар қазақ халқының тарихи жолымен танысып, Қазақстанның тәуелсіз мемлекет ретінде қалыптасу ерекшеліктерін зерделейді. Бұл білім олардың тарихи дүниетанымын кеңейтіп, ұлттық және жалпыадамзаттық құндылықтарды тереңірек түсінуіне жағдай жасайды.

Қазіргі жоғары білім беру жүйесінде білім алушының кәсіби дайындығымен қатар, оның тарихи санасын, мәдени танымын және азаматтық жауапкершілігін қалыптастыру маңызды орын алады. Әсіресе, әртүрлі мемлекеттерден келген жастар білім алатын ортада Қазақстан тарихын оқыту мәдениеттер арасындағы өзара түсіністікті нығайтып, еліміздің тарихи және рухани мұрасын халықаралық деңгейде танытуға мүмкіндік береді. жоғары оқу орнына дейінгі білім беру кафедрасының оқытушылары білім алушыларға тарихи білім берумен қатар, олардың ұлттық мәдениетке қызығушылығын арттыруға, тарихи тұлғалардың өнегесін танытуға және қоғамдық құндылықтарды түсінуіне ықпал етеді. Бұл жұмыс қандастардың тарихи отанымен байланысын тереңдетуге де, шетел азаматтарының Қазақстан туралы танымын кеңейтуге де бағытталған. Республика күні сияқты мемлекеттік мерекелердің білім беру үдерісіндегі маңызы осында. Олар тарихи білімді өмірмен байланыстырып, өткеннің тағылымын бүгінгі күнмен сабақтастыруға және жас ұрпақтың ел болашағына деген жауапкершілігін арттыруға мүмкіндік береді. Ел тарихын білу – өткенді құрметтеу ғана емес, болашаққа саналы қадам жасау. Өз тарихын таныған, мәдени мұрасын бағалайтын және ұлттық құндылықтарды құрметтейтін ұрпақ қана қоғамның дамуына өз үлесін қоса алады.

Республика күні – барша қазақстандықтарды біріктіретін, елдіктің мәнін ұғындыратын және тәуелсіздіктің қадірін бағалауға шақыратын ұлттық мереке. Оның мазмұны мемлекет тарихына құрметпен қараудан, қоғамдағы бірлік пен келісімді сақтаудан, адал еңбек етуден және келешек ұрпақтың жарқын болашағы үшін жауапкершілік алудан көрінеді. Әл-Фараби атындағы Қазақ ұлттық университетінің жоғары оқу орнына дейінгі білім беру кафедрасы үшін бұл мерекенің тағылымы – білім алушыларға Қазақстанның тарихи жолын таныту, ұлттық құндылықтарды дәріптеу және ел тарихына құрметпен қарайтын білімді ұрпақ тәрбиелеу міндетімен сабақтас. Қандастардың тарихи отанымен рухани байланысын нығайту, шетел азаматтарына Қазақстанның тарихы мен мәдениетін таныстыру, білім алушылардың дүниетанымын кеңейту – елдің мәдени және рухани мұрасын ұрпақтан ұрпаққа жеткізудің маңызды бағыттары.

Республика күні құтты болсын! Еліміздің егемендігі нығайып, халқымыздың бірлігі мен ынтымағы арта берсін! Тәуелсіз Қазақстанның тұғыры биік, болашағы жарқын болсын! Ұлттық құндылықтарымыз ұлықталып, білімді де саналы ұрпақ ел игілігі жолында жемісті еңбек ете берсін!

ЖОО дейінгі білім беру кафедрасының аға оқытушысы Бегалиева Айша Кәріпжанқызы